Denomínase así a sala situada no andar baixo da torre, por ser este un espazo interesado en contextualizar o marco xeográfico, comunitario e familiar do escritor don Ramón del Valle-Inclán Peña, xenio e figura universal, de berce e filiación arousás.
Ofrece varios paneis explicativos, onde podemos consultar, de forma abreviada, unha presada de informacións contrastadas sobre os temas especificamente divulgados.
A biografía de don Ramón ten espertado o interese de numerosos investigadores e críticos literarios. Nace na localidade de Vilanova de Arousa, na banda sur da ría de Arousa, o 28 de outubro de 1866. Aínda que el, dado a fabular sobre a súa vida, unhas veces declarase ser natural da Pobra do Caramiñal, na banda norte da ría, e outras, afirmase que nacera nun barco que facía a travesía entre ambos os portos, no medio do mar. É posible rastrexar as súas orixes a través das propiedades familiares. Herdeiros de ascendencia fidalga, posuidores de pazos e rendas de foros campesiños nas terras do Salnés e do Barbanza, pero vidos a menos.