Don Ramón María del Valle-Inclán, «Señor de la Puebla del Caramiñal» —nome eufónico que tan ben lle cadraba e título ilusorio, cheo de resonancias de antano, con que el gustou de adornarse— ten sido un dos persoeiros máis singulares das letras españolas.
Agora o alcance dos seus pasos biográficos e das súas páxinas literarias da lugar a unha aventura feliz: a Ruta Valle-Inclán que nos trasladará como viaxeiros ao longo e ancho de Galicia. Se desexamos saber máis sobre as estadías de don Ramón pola Pobra do Caramiñal e o territorio Barbanzón sairán ao noso paso lugares vividos, como os casais de Colo de Arca e da Mercé, villa Eugenia, o antigo hostal Ferro, a farmacia Tato, a Casa Grande de Aguiar e Rábago, o pazo do Couto, a fortaleza dos Xunqueiras, Amarante, Camarasa e Gasset, a residencia do ensaísta Victoriano García Martí, a praia do Areal, o miradoiro do seu nome nunha das atalaias da Curota, as súas esculturas, a alameda… e resultarannos familiares escenarios inspirados nalgúns topónimos importantísimos, como La Puebla (A Pobra), Santa María del Caramiñal, Santa Cruz, Lesón, Viana, San Amedio, San Lázaro, A Conga, Bealo, Cures, Juno (Xuño), Bretal, Corrubedo, ou as illas de Ruano (Rúa) e de Sálvora… Grazas á súa incorporación ás letras valleinclanianas son unha referencia mundial.